السلام عليكم ورحمة الله وبركاته ...
تميم ... يا حاج ما نحصلوش بنتك شي ستة شهور نزوزوها و نديرو معاها مشاكل ولا تطلع ما تنفعش ولا خلوقي يضيقن ونكون مش امتاع زواج انطلقها لك؟
الحاج ... و الله من حيث المبدأ مافيش مانع لكن خلي نسأل عليك قبل بعدين نشوفو راي البنت. عطيني كم يوم تو انرد عليك ...
خود راحتك يا حاج ... هذا رقمي كلمني امتى ما تبي ...
الحاج ... جا تميم يخطب فيك يا سوسن ...
سوسن ... من تميم ؟
الحاج ... تميم الشاب العاطل الي ديمة في رأس الزنقة ... الي لا خدمة لا قدمة ...
وراهو يبيك ستة شهور بس و حيطلقك شن رأيك ؟
سوسن ... باهي بالك يطلع ما عندش كلمة ؟ وما يديرهش بعد ستة شهور و نحصل فيه ؟
الحاج ... خلي نسأل عليه قبل تو انقولك ايديرها ولا ما يديرها
سوسن ... الي اتشوفه يا باتي ...
ذهب الحاج ليسأل على تميم ...
الحاج ... من منكم يعرف تميم امتاع راس الزنقة ؟
واحد من الجماعة ... تقصد تميم العواطلي؟ الي يأمرو بيه في الشارع؟
الحاج ... ايوة هو بعينة
عماد ... هذا لا خدمة لا قدمة غير تقعميز على راس الزنقة و ينك يا سلف في حق دخانه و ما يبي حتى يدير حاجة على رويحته حتى امه ما يساعد فيها في جيبة فردة خبزة ... ومشكلجي ما يهني في روحه بكل ... ديما هرايج و عياط غير مرة مرة اتجيه على السكات ما يكلم حد ويقعد على حاله ... ليش تسأل عليه عندك معاه مشكلة ؟
الحاج ... لا ... مافيش مشاكل ان شاء الله ... يعني امتاع مشاكل هووما يهنيش في روحيته .
سمير ... شن الحكاية يا حاج ؟
الحاج ... و الله يا سمير تميم طلب سوسن للزواج ستة شهور ونبي نتأكد انه يديرها ما يطولش بيها ويطلقها بعد ستة شهور رايك ايديرها ؟
سمير ... حسب ما نعرفه ... نشهد بالله انه يديرها وممكن حتى قبلها من الناحية هدي كون مطمن و احط ايدك في امية باردة
الحاج ... الله يطمنك يا سمير ...
رجع الحاج الى سوسن
الحاج ... يا سوسن انا سألت عليه و راهو الكلام الي انقالي كله يأكد حاجة وحدة بس ...
سوسن ... شن هي ؟
الحاج ... ان الراجل هذا مشكلجي و عاطل و ايديرها يطلقك بعد ستة شهور مافيش منه خوف يطول بيك ...
سوسن ... يعني مضمون يطلقني ؟ ما نحصلش عنده العمر كله ؟
الحاج ... مش مضمون وبس ... ممكن حتى يطلقك قبل ستة شهور ... مش ستة مرات حتى اربعة ولا ثلاثة شهور و تروحيلي هن ...
سوسن ... خلاص لو انت متاكد منه انه يطلقني ما يطولش بي ونحصل فيه وتحصل في... انا موافقة ما عنديش مانع
الحاج ... خلاص خلي انكلمه يلم روحه ويوتي روحه انديرلك عرس دنداني ما داره حد قبل ...
سوسن ... ايه نبيه عرس كامل ونبيه في صالة السوليتير... و الفيلو نشريه من دكان الفيلوات امتاع كلوديا و بنوصي على الكنافة من سوريا و البونبونيرات من دبي هن و الكروت و لازم ينطبعن غادي بامية ذهب ... وكيكة العرس حنوصي عليها من موناكو قالو في طباخة مش عادية غادي ... و حندير تسريحة شعري عند حلاق باريس ...
الحاج ... لكن راهو انقولك ما عندش حوش ... ولا سيارة
سوسن ... عادي مش مهم شن المشكلة هن كهلن كلهن ستة شهور نصبرهن و ونتفارقو ونقعد مطلقة و على قولتك مرات يديرها قبلها بواجد نفتكو منه ... خلينا في برنامج العرس توة ... و خلي انوتي قائمة عزومة صاحباتي كلهن خلي يعرفن اني درت احسن حفلة عرس و يحكوا بيه كلهم ...
الحاج ... حقك على الي تبيه انديره و ماني مقصر معاك في حاجة الا ما نديرلك عرس تحكي بيه البلاد كلها ... كم عندي بنت انا ...
سوسن ... ماتنساش الزفة في سيارة مرسيدس مانبيش غيرها ...
الحاج ... حنوصي عليها من المانيا يا سوسن وماتفوتش علي لون الصالون امتاعه الي تحبيه ...
سوسن ... تسلملي يا احلى اب في الدنيا ...
الحاج ... خلي نتصل بيه نقوله تم ونتفق امعاه على التفاصيل ...
سوسن ... مادابيك الموعد ما يكونش بعيد ... خلي نبدا انوتي روحي من توة ...
اتصل الحاج بتميم و حددوا موعدا ... وتم العرس الخرافي لزواج الطالق ... وكان حظ سوسن ان تميم طلقها بعد اقل من شهرين فقط ... و كانت سعيدة بذلك ... وفرحت بأنها دخلت على زيجة مضمونة مائة بالمائة
9 التعليقات:
السلام عليكم
أضحكتني أضحك الله سنك
لكن بعد الضحك بقيت أتأمل في حالهم
هل سنصل إلى هذا الحال يوما ما؟؟؟؟؟؟
أخشى أن يكون ما كتبت اليوم واقعا غدا
لكن أخبرني
هل دفع العريس ( مؤخر صداق ) عروسه بعد أن طلقها؟؟؟
سلامي
تصدق بدت تصير برغم ان القصه فيها هلبه مبالغه؟لدرجه ان خطبه الجمعه اللي فاتت في الجامع القريب لينا كانت تناقش في موضوع الطلاق اللي كاثر!
سلام
القصة محبوكة تمام ، ربما ربط القصة بالصورة يعطي رسائل واضحة لاكثر من نقطة !!؟؟ ... هناك عدد من الدول التي تحسب نفسها على الاسلام لاهداف غير معلنة يفتى كبارها بمثل هذه أعراس بحيث يتم الاتفاق على موعد للطلاق ( قد تكون المدة يوم أو يومين...!! )،هذه من ناحية.
من وجهه نظر أخرى أذا ما كانت ( سوسن ) كبيرة العمر وتقترب من 45 وتعمل ولديها العلم بمن تريد أن تتزوج ( شخص بمثل الاوصاف التي ذكرت عاطل عن العمل ومشكلجي فقط بحيث أنه يصلي ويصوم و ... )فما الضير من موافقتها على الزواج بنيه الاستمرار فيه وبعد ذلك لكل حادث حديث
إذا كان عمر ( سوسن ) 20 أو 25 فكلامي سيتغير 180 درجة :)
و عليكم السلام ورحمة الله وبركاته
سررت لادخال البسمة على قلبك ...
و اصدقك القول ... انني ضحكت كثيرا عندما قرأتها بدوري بعد ان اكملتها ... فقد كانت وليدة اللحظة ... دون سابق انذار ...
بالنسبة للطلاق .. فكان بالخلع ... فقد يأست من ان تستمر معه يوما احدا و تنازلت عن كل شي جلبته معها ليطلقها ... فلم يكن هناك اي مؤخر او نفقات دفعها تميم ... وربما سيتزوج اخرى بذلك المال ...
اما عن هذا الحال ... فنحن فيه اليوم بشكل ضمني وليس بالمفضوح كما جاء في قصة تميم و سوسن :)
فكثير من الاهل يزوجون نباتهن زيجات هم في داخلهم موقنين انها زواجة فاشلة بكل المقاييس ولكن يستمرون فيها و يزوجون ابنتهم .. . اما لانها تريده و بينهم قصة غرام ... ولا يرى احدهما حقيقة الاخر او لانهم يرغبون في ان يقللو من الحمل الذي عليهم من احساسهم بان زواج البنات اصبح صعبا ...
فالامر موجود في الواقع ولن اقول للاسف فهذا ما يختاره الناس لانفسهم ..
شكرا لك
خالص تحياتي
السلام عليكم ...
القصة خيالية وهي وليدة اللحظة كما ذكرت ... غير ان ما يحدث اليوم هو ضمنيا وكانه هذا الحديث الذي دار بين الحاج و ابنته ... فكما ذكرت في ردي السابق الناس اليوم يزوجون بناتهم زيجات هم في داخلهم موقنون انها زيجات فاشلة اي ان ابنتهم لا محال طالق ... لعدم كفاة او عدم تكافوء او اسباب كثيرة اخرى ...
ونسبة الطلاق في الزيجات الجديدة حسبما عرفت من احد الاصدقاء انها تصل الى خمسة وثمانون في المائة ... وهذه ارقام مخيفة جدا ...
و ان كانت صحيحة ... الا يكون دور تميم و الحاج و سوسن واقعا ؟
شكرا لك
خالص تحياتي
السلام عليكم
اخي اليكم ... اهلا بك .. ومرحبا ..
اشكر تفاعلك المستمر ...
سوسن عمرها 24 سنة :) وليست كبيرة في السن ولكن كما ذكرت ان الزيجات اليوم لا يركزن على ما يجب التركيز عليه في الزواج لا الرجال ولا النساء ... الكل يرغب فقط في ان يعيش مهرجان الزواج و ان يشعر بانه ليس كغيره من العزابة و العازبات ... وانه اقدم على خطوة جبارة ... و النتيجة ان ما يبنى على باطل فسينتهي به الامر باطلا ...
وكل الاحتمالات واردة في زواج الطالق التي محكوم على زيجتها بانها فاشلة قبل ان تتم ...
شكرا لك اخي ...
خالص تحياتي
السلام عليكم ،،
اخى ... لقدوضعت اصبعك على الجرح ! فما ذكرته اصبح واقعاً ملموساً نعيشه ولا نعترف به !وما لفت نظرى ويزعجنى حقاً فى يومنا هذا هو غياب دور الاسرة فى اختيار الطرف الاخر او حتى لرأب الصدع فى العلاقة بين الزوجين , فقديماً كان الطلاق عيباً ( بغض النظر اذا كام مستحقاً او لا ) اما الان فهو عـــــــــادى ولما الخجل ! بل بالعكس فقد سمعنا كثيراً عن اباء وامهات يشجعون على الانفصال ولاسباب اقل مايقال عنها تافهة وصغيرة .
سلمت يداك يا أخى .
هيام
مساء الخير والحقيقه سرد سلس وقريب من موجود العقل بس ما ضحكتش تغششت وعشت مع قرائتها في زوابع واعاصير ومر شريط مشاكل العالم كله باللحظات التي كنت اقرأ نص فكري عميق يعالج مشكل كبير جدا ويحتاج ال ي سنوات من الدراسه لوضع حلول ناجعه احي قلمك وموهبتك واستجديك الاستزاده وانا اعتقد انه لازال عندك الكثير اتنمني لك الخير
بصراحة تفكير يدل عالذكاء ويقولو عليها مطلقة احسن من انه يقولو عليها عانس في مجتمعنا اللي للاسف يبي اعادة برمجة
إرسال تعليق