بقعة واحدة ، لسان واحد ، سماء واحدة ، والبحث عن الاتفاق الجوهري

.

الأحد، 7 يونيو 2009

درت نوبايل حتى انا

By 3:09 ص

الجماعة كلها دارت النوبايل ...


باهي شباب شن فايدته ...

 

كيف؟ .. ايجيب في شغل ... يطمن اهلك  عليك ... يجيبلك النجدة ...توقف بيك سيارتك ... الخدمة  يلقوك وين ما انت ..

 

قلت بومتاز .. معناها الواحد لازم ايدير نوبايل ...  على الاقل ايصيرله اللي يقولو عليه الجماعة ...

 

مشيت بنشري ... قالولي كان تبيه للخدمة .. اشري ... المتار خيرلك ..

 

قلتلهم وخيرها ليبياتا .. قالولي متاع جو .. والكروت برنامج اتقول هكي تلقاه تام .. حتى بعد العشرة قروش نفس الشي


قلنا باهي .. شرينا الشفرة .. وشرينا جهاز... امتاع 45 دونار ليبي ..


جيت للجماعة لقيتهم .. يبعتو لبعضهم في الصور بالبلوتول


 ابعتولي شباب ... افتح بلوتولك ... 


طلع جهازي مافيشي بلوتول


مشيت قلت احسن حاجة انبيعه ونشري واحد فيه بلوتول


بعته وزدت عليه وشريت واحد فيه بلوتول ...


وجيت بنبعت للجماعة ... شوي بعتولي ملف  ام بي تري ...


طلع جهاز ما ايشغلش في الام بي تري ...


شن بندير ... بعته بخسارة وزدت عليه  وشريت واحد فيه بلوتول وام بي تري ماهم ماقالوليش عليها قبل ما ناخده الجهاز ....


فرحان جيت للجماعة .. ليقتهم ايصورو ... بالموبايل امتاعهم .. جيت بنصور لقيت روحي .. موبايلي مافيشي تصوير .


شن بدير ... بعت وشريت ... بخسارة ايه ماهو مستعمل ... يوم واحد بس

 

جيت انصور ..


لقيتهم ايتفرجو على الكليب امتاع الفيديو ... ولقطات وحاجات اضحك ... 


 بعتوه لي ... اي ماهو نوبايلي فيه بلوتول .. 


جربته في نوبايلي ما باش يخدم ...


قالولي يبي سوفت وير ...


مشيت ركبتله سوفت وير ...


شغل الكليبات ...


فرحان انا ... خلاص جهازي فيه بلوتول وام  بي تري ويصور ويعرض كليبات ... وانوزع في رقمي في كل مكان ...

 واحد من الشباب قالي خش شوف الصفحة امتاع الترنت هذي ...

قلت له شنو ؟ 

وطلع نوبايلي مافيشي انترنت ... وما نقدرش انركب البرنج عليه ...؟ البرنج امتاع التهدريز


حرام عليكمم كيف خديته وماقالوليش عليها ....


باهي شن؟ انبيع وناخد نوبايل فيه ترنت؟ 

 اكيد ... بعته "بخسارة لكن شوووية" وخديت نوبايل فيه بلوتول و يشغل ام بي تري و فيه كاميرا و يشغل فيديو و يخش على الترنت 

خلاش توة كل شي فيه نوبايلي ... معاش نبي نعدل علي حد ولا علي شي ... الي يبي يبعت ولا نصوره و لا نسمعه اغاني ونهدرز معاه في الترنت ... مافيش مشكلة 


ماشي في امان الله فرحان نوبايل جديد وفيه كل شي نسمع في الشباشبية مروح ، فجأة رن التلفون .. رديت  عليه .. طلع رجوبة .. اللي يشريلي ويبعلي في النوبايلات الي خديتهن كلهن.. مع نسمعلك سارينا قوية .. و واحد ايقولي درس يمينك ...


واتجيني هذيك المخالفة امتاع النوبايل ... وباهي الي ماعدل على الحزام...


تي كيف صار .. وين الخدمة ... والاطمئنان  امتاع العيلة .. و الافاريات ... ولما تصيرلك مشكلة تلقاه ، هو بروحه معاي انا دارلي مشكلة ...و كله عدى فيها؟

 

 

تي منوين بنجيبهم .. وانا مكملهن على النوبايلات

 

 بعت النوبايل الي فيه بلوتول و يشغل ام بي تري و يصور ويشغل فيديو و يخش على الترنت و البرنج ودفعت المخالفة ...


ومنها .. قلت النوبايل هذا ما اندارش  للعب ... وتضييع الفلوس .. والكليبات والكلام الفارغ ...


وحلفت عليه الا ما نشري جهاز بيلة ... وما ني مشتعمله الا للضرورة ...

 




شكرا ...


 

 

2 التعليقات: