السلام عليكم ورحمة الله وبركاته
جمعة شن تخدم؟
سواق…
سواق شنو؟
سواق تكسي...
باهي ليش راقد المدة اهيا ما
نشوف فيك تطلع وتتسهل وتسترزق كيف الدوة؟
بالله خليها في سرك يا فتحي
خليها مدفونة
تي كيف يا جمعة خليها في سرك يا
راجل شن اللي صاير احكي أنا خوك
والله يافتحي الخدمة ما في كيف
نخدم وكيف بتخدم تكسي وسيارتك اتخدت
كيف صار كيف اتخدت؟
يومها خطمت علي بوابة وقفني شبيب
قالي باسمك السيارة؟ قلت له لا بسم تشاركية ، طلب الاوراق عطيته ،،، مع نادى على
الي معاه وقالي درس علي اليمين
درست نزلت كانوا كاتبين على
سيارتهم ثوار السلحيبة ،،، والحكاية مرشقة سلاح ، قلت له خير؟ شن في؟
قالي السيارة هدي مصادرة جاي
فيها بلاغ
قلت له بلاغ شني يا راجل شن تقول
انت عندي فيها تصريح السيارة
باه شن قالك ؟
قالي هذا هو بتسلم المفتاح
بالهادي ربي كان بها كان هذا نعرفو شغلنا معاك!!
كلمتنا باهي ؟
تي وين إنكلمك يا فتوحة وقتها
خشت بعضها وهرب علي الضي وهم الجماعة مسلحة قلت اللهم نمشي نشكي وخلاص
باهي شكيت ولا شن درت؟
اي مشيت للمجلس العسكري وشكيت
قالولي ان شاء الله خير
وامتي صار هذا كله؟
هذي الدوة ليها اسبوع توة.
باهي ماقالولكش ليش صادروها
السيارة؟
لا ماقالوا شي ولا عطوني فرصة
نتكلم اصلا ...لا اله الا الله ... والحال اهو تشوف فيه
اسمع يا جمعة ولا يهمك موضوعك
عندي أندير لك فيه رأي ان شا الله
...
الو رضا شن الجو؟ وينك نبيك
ضروري
ايوا فتوحة شن أخبارك أنا في
الجمعية تعال كانك قريب
اي شوي ونكون بحداك مش بعيد
...
مبني اداري حكومي سابقا عليه
لوحة كبيرة تقول
جمعية الوطن بس والباقيين
عس
مسلح امام الباب. تفضل يا
اخ
جاي للأخ رضا توة كنت معاه علي
التلفون
...
تعال خوي رضا عندي موضوع نبيك
تخدمني فيه
تدلل خوي فتحي خيرك سابق ... كيف
يبارك فيك نبو انديرو برنامج هذا
الي يقول له بازار يجمعو فيه الفلوس بالماكلة والتعليقات والجو
إيه عادي انديرو شن المشكلة ولشن
بتجمع الفلوس
انت غير نضملي الجو وتو انقولك
ديره تحت شعار " الي انجرح يلقي من يعالجه "
حلوة و الله انديروها اهيا
إيه ودير دعوة عامة وكتر الشقاشق
والأكسسوارات وتوة نكلمة الزبيطة يجيب الفرقة وأنتكمو الجو
تم فتوحة ولا يهمك أمتي
تبيه الموعد؟ وين انديروه ؟ في الساحة الي مقابلة الملعب؟ وين في المراجيح
إيه يمشي حالها مية مية
تم ان شا الله
يوم الأحد باهي؟ عندك ثمانية
ايام ... تمام
بعد 11 يوم ... جمعة يدور بسيارته التاكسي
الجديدة الملمعة يتخير الزباين ... فتحي مبتسم يتفرج على تلفزيونه الجديد ابو 50
بوصة
تكبير ... الله أكبر
7 التعليقات:
لا حول ولا قوة الا بالله .. وليك انت بـآلذآآآت : انت رآئع فوق الوصف !
معليش ههههههههههه
باهي غير إستفاد واحد ليبيي الحمد لله،اهو موضة في البلاد هالبازار.
تقبل مروري
OMG
هادا بجد في ناااس هكيي !!!!! نسأل الله السلامـه والله كانا حق ليك الله يا بلادي يا حره :|
جت في جمعه ويبي يخدم عادي خير ما تجي في ناس الللي ع بالنا
صادمٌ ومُؤسف أن يكونَ من بيننا، من ينتهج نهــج "أخطى رآسي وقِص" .. الذي يُضاهي الأنانيــّة ، وشخصنة الإنجاز إلى ما فوق ذلك ، بعدَ كلّ هذه التضحيـات وكمّ الجِــراح التي جاوزت حد المعقـول في ثورتنـا !
ومُخيب للآمال أن أقرأ على هذه الصفحـة تعليقات من سبقوني، التي تستخف بهذا العمل اللاأخلاقي الذي خلا من نخوة الدّيـن ، وأنفـة الرجولـة وكبريائهـا ليتسوّل بطريقـة اللصُــوص .. ويُسمّـى بأنـهُ "ليبي استفـاد" .
فمهما كانت هذه الغنيمة "يســيرة" في منظـور البعض ، بالمُقارنـة معَ تلتهمُـه القطط السّمــان .. فلن يُستهان بها ..!!
أيها السادة هُناك أرواح قد غادرتنا فـ لاقت ربها ، وأطفال تيتمت ، وأمهات ثكلت ، وأخرى ترمّلت ...... لا ليأتي من بعد ذلك من يستغلّ سُوء المُتابعة القانونيّة والتغيّب الأمــني ، لتحقيق مطامعه الخاصّـة ، وتحقيق مكاسب ماديـّة بأسلوب نـزق وذكاء محـدود !
ما الفرق الآن بين جُمعــة وكتيبـة ثـوار السلحيبـــة ؟؟!
هُما وجهـان لعُملة واحِدة .... / سَـ ندورُ في حلقـة مُفرغة ، وقريبـًا ستفرغ حتى من الهـواء ، إن توقف الطمُـوح عندَ هذا التفكــير التهميشي للهفـوات ..!!
"إنّ اللهَ لا يُغــيّر ما بقــومٍ حتى يُغـــيّروا ما بأنفسهم "
دُعائي يا ربّي أن تُغيثنــا بغيثٍ من حُسن الرضى والقنـاعة، ونبذ الطمع والجهالة هذه التي المُتفشيــة في مُجتمعنــا .:'(
إرسال تعليق