بقعة واحدة ، لسان واحد ، سماء واحدة ، والبحث عن الاتفاق الجوهري

.

الجمعة، 15 مايو، 2009

قطعة أرض للبيع ... برخص التراب ...

By 3:30 م
السلام عليكم ورحمة الله وبركاته ...


هذا مجرد إعلان عن قطعة ارض للبيع لمن أراد أن يبدأ حياته .. بشكل بسيط ...


المساحة مش بطالة ... كويسة ...


و ليها واجهات كفاية ...


وتقدر تبني فيها وقت هو اللي ما فيش ...


يعني تبي الموضوع يتم بسرعة ...


و فيها مشكلة وحدة بس الأرض ... مش عارف لو تقدر تلقالها حل ولا لا ...


يعني هي مشكلة ما نقدروش انقولو مش مشكلة ...


و اللي يبي يدير راي يدير ...


الموقع ... فوق كوبري طريق المطار ... الكوبري الحديدي ... بالتحديد في النص ...


عند القمة ... وتقدر تاخد الطريقين الرايح و الجاي و اللي يبي يقدر يمشي طول ولا يهمكم ...


ما يكلمكم حد لوحيظة بالله عليكم توة في حد منكم خش عقله الكلام اللي فوق هذا ...؟


يا ودي امهئه ... ماضنش ... صح ...ايه اكيد صح ...


من المهبول اللي بيبني حوشه فوق كوبري ...ما تخشش العقل ...



مستحيل الاستقرار عليه المكان هذا.. و الدنيا راكبة بعضها ...


اي توة هذا كلام اتوافقوني عليه ..


امالا كيف ...


كوبري... اخرتها .. صحة لينا و الله ....



مادام هكي الدوة ... و كلنا موافقين ...



امالا شن صاير فينا قاعدين نتقاتلو و ناكلو في بعضنا على الكوبري اللي عايشين عليه ...


بكى سيدنا عمر بن الخطاب عندما رأى اثر الحصير على جلد رسول الله ... فسأله النبي صلى الله عليه وسلم .. فقال ان كسرى و من مثله يتنعمون في هذه الدنيا ... وانت رسول الله تنام على حصير ( لم اذكر النص بالتحديد ولكن الخلاصة باختصار ) فرد رسول الله صلى الله عليه وسلم ما انا في هذه الدنيا الا عابر سبيل استضل بضل شجرة و استراح ثم اكمل المسير ...


إذا الدنيا مجرد كوبري ... فلماذا نحن بهذا الحال على هذا الكوبري ...


الا من رحم ربي


إن أردت فسارع الى شراء أرضك في مكان مستقر تدوم لك فيه الأحوال ...



فمن خاف مقام ربه فان الجنة هي المأوى

2 التعليقات: