بقعة واحدة ، لسان واحد ، سماء واحدة ، والبحث عن الاتفاق الجوهري

.

الثلاثاء، 8 ديسمبر، 2015

شمها الشيطان

By 10:29 م
السلام عليكم ورحمة الله و بركاته






لما إطيح منك حاجة كنت تاكل فيها ومعش تنفع انك ترفعها من الأرض يقولو لك خلاص شمها الشيطان 

مع إن الشيطان مش محتاج يشم شي من على الأرض وفينا من يأكل وما يسمي بِسْم الله 

و أنت لازم طبعا تاخذ الحاجة وتحب عليها و تلمسها جبهتك وبعدين تشوفلها مكان مستخطي ما يعفس عليها حد حتى لو مازال خاطرك فيها وما تبي تسيبها ...لكن ما وجدنا عليه آباءنا و إن كان غلط أهم من الي انت تبيها و إن كانت صح ... 
ومرات يخطم حد جيعان ولا تعبان ومش لاقي ما يأكل و يلقطها و ياكلها و يفرح بها وهي تفرح به … 

و شمها الشيطان توة حتى فينا نحن ... 
ريت كيف نتعاملو مع المطلقة و حتى المطلق والأرملة؟ و حتى الأرمل خاصة لو عندهم ذرية؟
شمهم الشيطان خلاص حطهم في مكان مستخطي ما يقربهم حد… اللهم يجي حد جيعان ومافي حل غيره خلي ياخد ...

ريت كيف نتعاملو مع اليتيم أو الي لم يعرف له أب ولا ام … وما عنده فيها ذنب؟
شمه الشيطان من زمان بكل وما تشوفله إلا بعين الشفقة و الشك وربما المسكنة و الإزدراء … ومع ذلك ما ندورو في حل جذري للتقليل من هذا الشي … 

عمرها ولا عمره كبير ... طاحت صلاحيتهم خلاص إلا لو بيكون في عرم فلوس ولا إضطرار وما لقينا غيرهم ...

شمهم الشيطان خلاص ... وحتى تحب وتحط على الأرض لا ... منتهي الأمر لأننا كاملين كلنا و مكملين و حلوين و أنيقين و أبناء عائلات كلنا وما فينا أخطاء ولا زلل و لا نقص كيف شن يقولو علينا بعيدن … واخذين حاجة شمها الشيطان؟

ومع ذلك ... تغوينا الفلوس و الواقع أنها تشرينا والي عندهم فلوس يشرو شن يبو "الا من رحم الله" مطلقة وعندها فلوس ؟
تصبح عادي ترفعها من الأرض و تنفخ عليها وتسمي بِسْم الله وتآكلها و الشيطان أصلا ما يشمش

عنده فلوس؟ عمره كبير؟
عادي أنا أصلا ما نحبش صغار السن مش ناضجين و الكبير يفهمني ويقدرني و نرتاح معه أكثر ... والي عنده فلوس الشيطان ما يشمه اصلا ؟ الشيطان يمشي للفقراء بس … 

الا من رحم الله ... منافقين نكذب على أنفسنا ... نتبع أهواءنا ... وحيه عليك كان قلت واكل خبزة وتبي تأكل وحدة اخرى ... 
وقتها تكون أنت الشر بذاته ... ومش شمك الشيطان لا أنت الشيطان أساسا 
إلا لو ... معبي ... مريش يعني عندك ما يحل العين المغمضة  ... وقتها شن المشكلة المهم راجل ... واصلا حلال و أنا نحبه وهو يحبني و زوجته الاولى موافقة و حيعيشني و يعيشها قادر يعدل بيناتنا … و ما يشمش الشيطان عنده زكمة وقتها …

كله شمه الشيطان إلا بعد فوات الأوان أو بوجود المال ...
تقولي لا مافي منه ... نقولك ترومها ...
خلي يتقدم بك العمر شوي و ما يأخذك ولا يعدل عليك حد ولا تلهى بحاجة على حساب غيرها وبعدين بروحك بروحك ... ترومها 
شمها الشيطان ... واخذ قسمه ... نص كم ... اي شي 
و حترومها حتى لو مش أنت … لكن ابنك أو بنتك … أصبحو في وضع شمهم الشيطان في المجتمع … الي لو ما يلحق روحه … حيشمه الشيطان حتى هو …
ترومها 
وعادي كنها الخبزة الي شمها الشيطان مازالت تتكل ... على السنة تنفخ عليها و تاكلها ... 


شكراً…

0 التعليقات: